Addasu modiwlyddion alosterig signalau glwtamat at ddiben gwahanol ar gyfer therapi glioblastoma

Mae glioblastoma yn fath ffyrnig iawn o ganser yr ymennydd mewn oedolion. Mae’r canserau hyn yn anodd eu trin oherwydd eu bod yn mynd yn ymwrthol i therapi ac mae’r ymwrthedd hwn yn gysylltiedig â’r ffaith nad yw’r celloedd tiwmor i gyd yr un peth. Er enghraifft, mae rhai celloedd glioblastoma yn cysylltu â’i gilydd i ffurfio rhwydwaith, sy’n gwneud y celloedd tiwmor cysylltiedig hyn yn fwy ymwrthol i therapïau. Mae nerfgelloedd o’r ymennydd yn gallu cysylltu â’r rhwydwaith tiwmor hwn hefyd a helpu glioblastomau i dyfu yn anfwriadol.

Er mwyn i nerfgelloedd a glioblastoma gyfathrebu, mae angen proteinau penodol (a elwir yn dderbynyddion glwtamat) sy’n caniatáu i glioblastomau ‘ddarllen’ y signalau gan y nerfgelloedd. Mae ein harbrofion yn awgrymu bod glioblastomau yn gwneud derbynyddion glwtamat sy’n wahanol i’r rhai a geir yn yr ymennydd cyffredin.

Yn y prosiect hwn, byddwn yn profi a ellir targedu derbynyddion glwtamat glioblastoma gan gyffuriau a elwir yn ‘fodiwlyddion alosterig negyddol’, neu NAMau, i atal glioblastoma rhag tyfu. Byddwn yn ceisio datblygu NAMau newydd sy’n gweithredu yn erbyn glioblastoma heb effeithio ar dderbynyddion glwtamat yn yr ymennydd cyffredin, a ddylai arwain at lai o sgil-effeithiau na chyffuriau presennol.

Os byddwn yn llwyddiannus, dymunwn ddatblygu NAMau fel therapïau glioblastoma yn y dyfodol.